Hazret-i Abd-ül-Âziz Hân-ı kerâmet intimâ
Verdi din-ü devlete revnak o şah-ı müçtebâ
Ol şehe tav’an olur münkaad cemi-i müslimin
Bittabi metbu olur böyle imâm-ı muktedâ
Maksad-ı Âlisi mülk-ü milletin îmarıdır
Çok muammer eyliye zât ı hümâyûnun hudâ
Mekteb-i rüşdüyyeler yaptırdı herbir beldeye
Oldular etfâl-ı nâdân nâil-i rüşd-ü zekâ
Hamdülillah Ruşen oldu Ayıntabın aynı da
Mekteb-i Rüşdiyye’nin olup türâbı tûtiya
Hoca-i evvel Cenab-ı Mustafa Efendi kim
Ol huceste vâkıâ tâlim-i sıbyane sezâ
Her fünûn-u mârifetten feyz alırlar pek güzel
Hüsn-i hulkuna heman etfal kılsun iktidâ
Hoca-i sâni de Abdullah efendi ol dahi
Etmede, talimde hasbî kemâl-i îtinâ
Sarf-ı himmet kıldılar bu mektebin îmârına
Rıfkile teşvik edüp kaimmakamı dâimâ
Haci İsmâil Efendi kim odur kaimmakaam
Layıkınca aun kıldı hak bu kim suph-u mesâ
Gülşen âsâ oldu bir cây-i neşat efza bu kim
Anda bülbüller gibi etfal etmekle nevâ
Hüsn-ü nazmile bu mektep oldu gûya bir kitâp
Suret-i fihristtir revzenler anda câbecâ
Bu makam ı dilkeşi bu saay-ü ilmi seyreden
Bizzarure padişah âleme eyler duâ
Mekteb-i Rüştüyyenin imârı bulunca hıtâm
Tarz ı matbu üzre oldukta makam-ı dilkuşâ
Dür-rü-meknûn gibi nazmettim ânâ tarih-i tâm
Aynıtab’ta mekteb-i Rüşdüyye bu yıl nev binâ
1288 (1872)
Hasırcı Zade Hafız
Mehmet Efendi